Tera de casa mia, tera dea xente mia, tera che fa festa co a sente criare on toxeto che nasse, fin che i ghe mette e fasse.
Tera che sa de papaveri e vioe, de ua e formento, tera che sa, de piova e de vento.
Tera veneta mia, ndoe che so nato, ndoe che e raixe se impianta; tera ….beissima tera, tera che canta par mi.
Voea e rondinee in tel ceo, fin in te a nuvola pi scura; ti tee vardi, te sogni, col soe che te scalda, col soe che te basa, rosso al tramonto cofa ’ na sbrasa.
Tera mia, tera nostra, fata de polvare e lagrime, de sangue e fadiga, tera de gaeantomeni, esempio par nialtri, prima che par staltri.
Tera de emigrai, in tii tempi de fame. In tii tempi de guera, tera che ga cria ’ vedare partire so fiui,
ma che oncuo ’ sa verzare i brassi a chi torna, a chi riva da distante bianco, moro o zaeo, a ghe va incontro ai so passi.
Tera che da, a chi sa dimandare, tera che conosce, dea vita e angosce
Tera de mari e montagne, de laghi e pianure, de fossi e campagne, tera che sa da bon, quando che el versuro a verze. Tera che dorme, quando che a neve a querze.
Sacra tera Veneta, che dimanda rispeto, prima da nialtri, parche ’ poemo pretendarlo anca da staltri.
Tera che te imbrassa, cui te mete soa cassa, come mama te caressa, te strenze finche ’ tuto passa.
Tera data a mi, come al foresto, tera mia, indoe quando distante, torna e se rapossa el pensiero. A ti el me grasie, el me canto ….vero.
Roberto Zaniolo, da Viadelconte